PONGO EQUÍ ESTI ARTÍCULU QUE, SOBRE LA MIO POESÍA, ASOLEYÓ ANTÓN GARCÍA NEL SUPLEMENTU DE CULTURA DE LA NUEVA ESPAÑA DEL 05/02/13.

 

Xuan Xosé Sánchez Vicente, poeta

L'autor más importante del primer Surdimientu, y al que nada-y ye ayeno, lleva publicaos cinco llibros de poesía nos últimos trenta años



Xuan Xosé Sánchez Vicente, poeta Xuan Xosé Sánchez Vicente, poeta

 L'autor más importante del primer Surdimientu ye Xuan Xosé Sánchez Vicente (Xixón, 1949), fundador de Conceyu Bable, de l'Academia de la Llingua o del Partíu Asturianista, tres exes esenciales del asturianismu nos años setenta, ochenta y noventa del pasáu sieglu XX. Ye autor de cuatro diccionarios indispensables, de miles de páxines d'ensayu políticu, lliterariu o llingüísticu, ente les que podemos destacar el llibru «Les producciones clasiscistes d'Antón de Marirreguera» (2004), un estudiu lúcidu y eruditu sobre la obra del nuesu primer escritor. Tamién ye un críticu atentu y arrogante d'esta lliteratura, al que debemos les primeres reediciones de los clásicos («Esvilla de poesíes na llingua asturiana», 1979, modernización de l'antoloxía de Caveda de 1839), los primeros estudios sobre les nueses lletres dende dientro d'elles y una guía esencial p'averase a esta lliteratura, «Crónica del Surdimientu (1975-1990)», publicada en 1991 y que pide una actualización que traiga hasta los nuesos díes el repás de lo fecho.
L'inmensu trabayu que vien desendolcando en favor de la recuperación cultural d'Asturies ye prácticamente inabarcable, y quiciabes por eso nun ye raro que se pase de dides pela so contribución, como si'l so llabor perteneciera a un universu creativu paralelu al propiamente asturianu. Na obra lliteraria de Sánchez Vicente topamos cuentos, noveles n'asturianu y español y varies obres de teatru... Sicasí, ye la so faceta d'escritor de poesía la que destaca especialmente, porque tamos delantre d'un autor intelixente, de sólida formación clasicista, discursivu, metalliterariu y sobre manera innovador. La so poesía empieza a publicase en 1980 («Camín de señardaes») con una propuesta que nun va tener ente nós antecedentes nin consecuentes. A partir d'entós la so obra crez como si se tratara d'una islla desaverada d'esi conxuntu que llamamos lliteratura asturiana, que tampoco ye nin tan zárzanu nin tan variáu como pa permitise prescindir d'un autor mayor.
Son cinco los llibros de poesía que lleva publicaos Sánchez Vicente a lo llargo de casi trenta años: «Camín de señardaes (Antoloxía poética, 1974-1979)», 1980; «Poemes de Xixón», 1981; «De reidores costes», 1988; «...Y de llastientes picos», 1999, y «As de corazon/es/y/es», 2001. Cuando publica'l primer llibru tien trenta años y la so voz poética ta formada y madura. Los estremaos caminos qu'alcontramos naquel llibru son, en gran midida, pelos que va caminar la so obra posterior: poesía social, amorosa, de la naturaleza y la de referente lliterariu. Sánchez Vicente ye un poeta al que nada-y ye ayeno, nin temática nin formalmente, atentu a la forma del poema y a la manera na que s'agrupa en secciones nos llibros, a vegaes acarretando textos d'una entrega pa otra si considera que dalgunos yá publicaos cuadren meyor al par de les propuestes nueves.
Na so obra poética topamos sonetos y otres formes clásiques xunto a tiraes llargues de versu llibre, alcontramos poemes de tipu popular, cásique cantarinos, xunto a recreaciones erudites que xueguen a recuperar fragmentos clásicos perdíos. Con «Poemes de Xixón» afonda na construcción d'una poética civil y urbana a través d'imáxenes novedoses y riques, radicales en tanto que falen d'un mundu, el de la ciudá, que llevaba munchos años alloñáu de la escritura nesta llingua, anque tamién andulia brevemente peles zones rurales del conceyu.
«De reidores costes» ye'l llibru que marca'l puntu más altu d'inflexión llingüística (onde la creatividá léxica de Sánchez Vicente rescampla más notablemente, non siempre nel camín más aparente), pero ye tamién un llibru mayor, enormemente imaxinativu y orixinal, nel que les distintes voces del autor suenen plenamente, hasta construir una obra experimental y inconformista na que predomina'l versu llargu y envolvente y la construcción d'una épica social (Asturies siempre como fondu) y d'una lírica personal.
Na obra de 1999 «...Y de llastientes picos», que completa la xera entamada nel anterior, sigue ofreciendo recreaciones populares al par d'erudites reflexiones metafísiques. Hai una novedá nesti llibru que paga la pena destacar sobre l'interesante conxuntu, «Les cinco alfayes de política moral», na parte final, onde l'humor y la crítica social cargada d'ironía llogren eses xoyes poétiques qu'anunciaba'l títulu, poniendo en relación de manera sorprendente y divertida al Goethe morrebundu col paisanu de Ponga que se dispón a catar, o a Acebal y a Ánxel de la Moría con Heráclitu y l'agua contaminao de los ríos d'Asturies.
«As de corazon/es/y/es,» del 2001, última entrega poética de Sánchez Vicente, ye un llibru de cuarenta y tres poemes que fain por reinventar tou un pasáu lliterariu pa la nuesa llingua, al tiempu que se proxecta pa contra'l futuru. Empieza xugando yá dende'l títulu, un caligrama en forma de corazón que pue lleese de distintes maneres: «yes as de corazones», «y ases de corazones», «as de corazón es yes»... en fin, lo que se-y ocurra al llector. Con él, Sánchez Vicente conforma un volume heteroxeneu: romances históricos a la (re)conquista d'Almería, al nacimientu del reinu asturianu, poemes d'inspiración barroca, a la manera d'Antón de Marirreguera o de Góngora; poesía realista que podía tar escrita nel sieglu diecinueve, caligrames al estilu de les primeres vanguardies, recreaciones cultes de la poesía popular, al estilu de la poesía negrista antillana, pero cambiando los «sóngoro cosongo» por repeticiones fóniques asturianes: «carbayu de la carba, de la carba qu'escarba...» o «carbayu caramiellu/ carbayu caballeru». Nun falten les onomatopeyes, pero tampoco les xitanxáfores: «Sega, sega, sega/ Segadorí/ Ri, ri./ Segadorí». Ye tal la bayura d'estilos, formes, xuegos, cites... d'esta poesía culturalista y rica que nos aparra y cásique nun nos dexa ver l'extraordinariu esfuerzu creativu d'un poeta en plena madurez, al que siempre-y gustó innovar y el xuegu lliterariu.
Sánchez Vicente, que lleva más d'una década ensin publicar poesía, ye un autor nel que nun hai una única voz lliteraria, sinón munches. Como cada llector acarreta con él les sos propies querencies, tienen pa min un interés mayor les dos que conformen el carrastiellu de la so obra, dende los primeros textos a los últimos: la voz social, por esa mirada qu'echa en versu llibre a la cultura urbana, a la sociedá industrial en decadencia, sabiendo retratar mui bien los veros sueltos del estáu del bienestar, la marxinalidá, la vida de los más desfavorecíos... Y d'otru llau, la que yo llamaría poesía d'altu aliendu, la qu'escribe dende l'arte mayor, con rigor métricu y fondura, describiendo les impresiones que produz nel yo poéticu la mirada qu'echa a la naturaleza o a los obxetos cotidianos, onde ocupa una parte fundamental la so poesía amorosa, de la que topamos exemplos soberbios en tolos sos llibros.