Quesu afuega'l pitu: la palabra y otros.


Restolando per esti blog, atopo una entrada del 23/06/11 onde una resaliviada de Cuideiro (tendera por más señes) diz na Sexta Dos (19 de xunu de 2011, domingu, seis y picu la tarde):
"Queso d'afuega'l pitu, que en castellano es y se llama de "ahoga el pollo".



Esta asturianada (esta babayada, tan asturiana por tantes coses) afalame a da-y una vuelta al compuestu quesu d'afuega'l pitu o afuega'l pitu, tamién llamáu quesu de puñu o quesu de trapu.

Como se sabe, el quesu afuega'l pitu yera un quesu cenciellu y elemental, que se facía en cuantes cases d'Asturies gustaba y quería facese, ensin más requisitos qu'un cuartu de llechi fresco a la que se-y echaba cuayu, y, la mayoría les vegaes, un cuartu de llechi tarabazao (cortao); esto ye, yera con frecuencia una manera d'aprovechar la lleche que se pasaba.

Una vegada qu'esa llechi algamaba una cierta condensación, que formaba una masa, metíase nun tarru con furacos pa que fuese perdiendo'l sueru o, lo más frecuentemente, metíase nun pañu blancu (equí'l procesu ye entá más elemental, y nun necesita, nin siquier, una cacía específica), que se colgaba pa que fuese deburando. Cuando acababa de deburar, el quesu yá taba fechu.

Pero, de momentu, vamos a otra cosa. A ver qué se diz del nome del quesu, por qué se lu llama asina. Al respective suelen decise dos auténtiques tochures: la primera, que se llama asina porque diba dándose'l quesu a los pitos hasta que s'afogasen, cuando lo facíen, yá taba'l quesu. ¡Como si hubiere pitos abondo pa dir matándolos poco a poco nes cases o caseríes asturianes y el pitu nun hubiere sío hasta avanzaos los sesenta un manxar esquisitu y raru, esto ye, escasu, que se comía pa nuechibuena y que se regalaba pa pagar un favor estraordinariu! La segunda, qu'esa triba de quesu quita'l pitu (lo qu'agora los mélicos llamen pitos), esto ye, los xiblíos de los bronquios cuando tán un daqué tomaos. ¡Como si daquién tuviera visto en dacuando milagru talu!
 
Pal nuestru talantar, afuega'l pitu ye una metáfora que designa non el quesu, sinón la forma de facese'l quesu cuando s'envuelve nun trapu, pues, efectivamente, pela parte superior de la bola más o menos esférica que formen el recipiente y el quesu amarrábase una cuerda pa colgar el quesu, y perrriba la cuerda queda una especie de corona, que ye apaecía a la cresta del pitu, de mou y manera que bien puede vese'l conxuntu como un pitu afogáu o que s'afuega. De fechu, los quesos industriales de güei clatienen la forma y aspectu del envoltoriu en trapu, en sin la coroniella o cresta. Y, a mayor abundanza, el nome de quesu de puñu vien a reforzar esa etimoloxía nuestra: un quesu que ye como un puñu o que s'aprieta como con un puñu.
 
En Lleón esti quesu tuvo de modo nel sieglu XVIII y llamábase esgañapitos -paez que n'ocasiones traíase d'Asturies-. Esi nome, esgañar, que significa 'aforcar, afogar`, vien reforzar otra vegada la nuestra desplicación.

Pa lo cabero, vamos a ir a otru ámbitu de la cultura popular onde se da la mesma imasen de la cresta del pitu como forma de designar una especie o corona. Trátase del xuegu infantil que se practica o practicaba tirando pa enriba, ente los deos pulgar y índice, de la inflorescencia de dalgunes gramínees, como l'Holcus lanatus L. Vamos recordar cómo yera'l xuegu: enantes de tirar pa enriba de la inflorescencia ente los dos deos citaos, entrugábase qué yera lo que, al final, iba apaecer ente ellos, cuando recorriesen tol tallu la planta y atropasen a lo cabero les espiguines, y decíase ¿-gallu o gallina, pitu o pitina? Y según lo que saliera, el rapacín acertaba o non. 

Como se ve, entós, esa imaxen de la cresta'l pitu yera una imaxen común y enraigonada na nuestra sociedá, y, polo tanto, una guiyada visual pal establecimientu d'asemeyos ente les coses.

No hay comentarios: